«Den stygge andungen – Frå gate til galleri»

Atle Østrem (f. 1980) har bakgrunn frå graffiti og nyttar i dag desse teknikkane i maleri og grafikk, hovudsakleg på lerret. Østrem har sidan 2004 delteke på ei rekkje kollektivutstillingar, holdt separatutstillingar og hatt utsmykingsoppdrag, blant anna i Stavanger fengsel.
Sommaren 2012 deltok Østrem i prosjektet Komafest i Vardø, eit prosjekt kor den anonyme street art-kunstnaren Pøbel inviterte 12 kunstnarar som deltok i å finne fram til husveggar, murveggar o.l. som dei kunne måle på. Etter å ha fått lov frå huseigarar, riksantikvaren og kulturminneforvaltninga, laga kunstnarane dei karakteristiske bileta. Resultatet var eit spanande samspel mellom urbane kunstnarar og eit fantastisk landskap, noko Vardø si befolkning sette pris på.
Gjennom foredraget «Den stygge andungen – Frå gate til galleri» vil Atle Østrem gi ein presentasjon av sin eigen kunstnariske forflytning og transformasjon frå å drive med graffiti i gatebiletet til å bruke dei same teknikkane på lerret innanfor etablerte kunstgalleri. Som kunstnar er Østrem oppteken av å finne det vakre i det stygge og det stygge i det vakre. Under sine skolebesøk vil Østrem ta for seg ulike formar for urban kunst. Han vil dermed gi elevane ei innføring i samtidige og aktuelle visuelle uttrykk og berøre sentrale tema knytta til urban kunst, blant anna korleis den urbane kunsten finnes i det offentlege rom i både lovlege og ulovlege former og vert utøva av anonyme og ikkje-anonyme utøvarar.